13.
我望住寫滿大字既大門，靜默左一陣。
然後轉身，一腳踢開對面單位度門。
好彩呢度樓齡有返咁上下，對面呢個單位亦應該冇點維修過，所以唔需要我補多腳或者點用力，度門已經比我踢開左。轟隆一聲，成度門飛離門框，跌左係地上。
一個又細又殘又舊既單位，係月光同螢幕光映照之下，進入我既眼廉。
裡面冇開燈，只有窗外微弱既月光作為光源。同時裡面放滿左一個又一個既電腦螢幕，所以，屋裡面並唔暗。
所以，我可以見到一個清晰既白色人影，坐左係電腦螢幕前。
面具人。
佢拎轉身，望住我。
面具之下既表情，我冇辦法知道。不過我諗，佢一定好驚訝我既出現。
大家被遮掩既眼光，再次係空中交接。
靜。只聽到秒針擺動既聲音。
「你真係出符我意料之外，騎士仔。」佢先打破沉默，「我冇諗過你會搵到呢到先。」
「你拍片個陣，冇關到度門。」我壓低把聲，用拇指指住身後。
冇左木門既門框，係入面望出去，第一樣見到既野，就係「欠債還錢」。
段片係轉鏡頭既一剎那，影到呢四隻字。
可能對任何人，對差佬黎講，呢四隻追債既字，只係香港地千千萬萬追債既字之一。
佢地唔會留意，唔會即刻查到，亦唔會呢家去查。佢地一心係天光前去搵人質。
偏偏，只有我，會知道呢個人跡稀罕，冇人會住既破舊地方裡面，寫左呢四隻血紅色、揮筆有力、但係毫無美感既大字。
而我就係騎士。
命運由我著上騎士既服裝開始，已經將我帶左去一個只有佢想我去既領域。
「真係冇癮，同個八婆租左唔夠三日就比你搵到。」
面具人乾笑兩聲，係枱面拎起一個搖控器。
「但係你覺得你搵到我，就可以救到佢地咩？只要我輕輕力一禁個掣，全部人都會死。甚至，呢個單位裡面一早已經裝滿炸彈，我想既話，大可以同你同歸於盡。」
「你想禁就隨便。」我話。
大家又再靜左一陣。
「你話咩話？」
「我話，你想禁就隨便。」
「你由得佢地死？」
「嗯。」
「由得個一家人犧牲？」
「如果我係你，想同騎士玩既話，佢地就唔會係普通既一家人。」我答。
佢無語。
「可能，佢地三個就係果班黑幫既高層；又可能，跟本全部都係無辜既人。你要我失敗既話，方法有好多，我唔得閒諗。」
冇錯，我唔得閒諗，亦唔到我諗。
「我只係想黎打鑊你。」
當我講到呢度，突然向佢揮拳，鐵蓮花落左係佢既面具之上。佢一震，退後一步之際，我再一個手刀，將搖控器打甩。
佢企穩腳步，想還我一拳。
我用收係前臂既鐵通一擋，向前一撲，好快將佢禁左落地。
面具人，一個充滿犯罪智慧既人。
憑一已之力，一夜成為黑幫頭領，坐擁金錢同權力。
呢個本來就係我所追求既野。
大富大貴，至高無上。
唔係，即使唔係咁，起碼都可以衣食無休。
只係咁樣。
我絕對唔係想做英雄，絕對冇諗過咩打擊罪惡。
偏偏命運就係要我變成騎士，去對付面具人。
我呢家捉住左面具人係地下，係我眼中，佢就係我夢想既縮影。
我能夠做既，只有主動去面對佢。
我要親手毀滅呢個夢想。
呢個就係個天對我留下最後一個、最深一次既作弄。
「我已經報左警。」我繼續禁住佢，「你諗定點樣解釋你做過既野。」
「點解？」佢望住我，笑左出黎，愈笑愈大聲。
「一切都係因為你！」
沒有留言:
發佈留言