4.
打開電視，係一個新聞節目。
除左果個我成日留意既靚女主播之外，仲有兩個我認識既面孔。
女神同佢老公。
節目標題係「城中熱話 無名英雄再現」。
「……好喇，張生張太，可唔可以詳細咁講下個晚發生既事？」
「等我講啦……個晚我同太太食完宵夜返屋企，係街遇到個班不良分子。佢地首先挑逗我太太，繼而同我發生衝突。佢地人多，我唔夠佢地打，佢地就打算……對我太太出手。」老公低頭。
「出手就係指……侵犯？」女主播問。
「係。」老公一臉痛苦。
男人最痛，莫過於此。
「呢個時候，佢就出現喇？」女主播問，面露驚喜之色。
「係！」老公語氣略帶激動。「佢……就好似鬼魂一樣，無聲無色咁出現左！」
老公吸一口氣，繼續講：
「個陣個不良分子話要係我面前輪姦我老婆，突然之間一把好低沉沙啞既聲音就響起，話：『侵唔侵埋我玩？』，然後個不良分子就比一個黑影拉左入一條後巷，傳黎佢比人打既聲音。」
「哇，之後呢？」女主播追問。
「所有事都黎得好突然，好恐怖！大家都未回神，已經又有兩個不良分子唔見左，只係聽到佢地既慘叫聲！其餘三個完全唔知乜事，加上可能呢家七月鬼節，佢地大叫一聲『有鬼』就跑走。」
「就咁就完左？」女主播略表失望既神情。
「唔係！呢個時候一個黑影突然出現，一手禁低左一個走得慢既不良分子。個不良分子還手，但係個黑影好似完全唔覺痛咁，用手臂擋晒，反而個不良分子仲痛。之後黑影打左佢個塊臉幾拳，佢就暈左。黑影慢慢企起身，我終於見到佢……」
「佢係？」女主播問。
「佢係一個黑衣人，黑衫黑褲，載住一個黑色面罩既男人！」
「十足十漫畫、電影入面啲超級英雄？」
「係。跟住……」
「跟住，」一直冇出聲既女神，強忍淚水，接住講：
「佢準備走，我叫住佢，問佢係邊個。佢用個把好低沉沙啞既聲答我：
『我係騎士』之後就消失係黑暗之中……」
「佢自稱騎士！」女主播驚嘆。
「我真係好多謝你……我好希望能夠當面多謝你，比我知道我既救命恩人係邊個……」女神講到呢到，終於喊左出黎。
我頂唔順，熄左部電視。
我就黎癲。
望住畫面中女神喊既樣，聽住佢衷心多謝既話語，我唔知道應唔應該高興。
佢多謝既係救佢一命既騎士，而唔係想做賊仔既韋欣。
但係冇韋欣，就冇騎士。
屌，我屌！
我到底做錯咩，個天要咁玩我？
我要成功，個天將我踩落地底；我想打劫，個天將我變成英雄。
我到底要點做先好？
我到底係乜野？
包租婆既追租來電又再響起。我唔想聽，我個身一蚊都冇。
我望住窗外。
我想死。
沒有留言:
發佈留言