5.
深夜十一點四十三分，我一個人企左係唐樓既天台上面。
望住城市繁盛既燈火，我感受唔到任何亮麗既希望。
希望係留比人去追求。
而我係黑仔到貼地，不留半條空隙既廢物。
我救女神既時候，除左心諗住唔可以比佢知道我身份之外，腦裡面乜都冇。
就好似當年佢比人摑完個陣一樣。
我既世界已經唔存在，我亦唔存在於任何世界。
所以我個陣特登壓低自己把聲。
所以我個陣好快就走左。
所以我到呢家都唔敢去搵佢，同佢講清楚。
我唔敢存在於佢既世界裡面。
咁點解我仲要同佢講「我係騎士」？
「我唔知呀！」
我對住星空嚎吼，如我所料，佢冇比我回應。
隨之而來的係一片死寂。
我冷笑一聲，踏上九樓既天台邊緣。
我的失敗人生由女神比摑開始，我諗由我救到佢既時候終結係最好。
被星光拋棄既人，已經冇資格生存。
我要自殺。
本來無一物，何處惹塵埃？
反正我黎時乜都冇，呢家又係乜都冇，死又何哀？
做人太辛苦，特別做我呢種廢人，前路已經唔係白茫茫，而係地陷無路。
再活落去，只會因為冇租交而失身，只會失去最後既一個朋友，只會餓死係屋入面冇人知。
有時生命太頑強都唔係好事，我受夠了，不如自我了斷。
我一身騎士既打扮，準確一躍而下。
點解我要扮成騎士咁死？
因為我要話比人知，騎士並唔係大眾所想既英雄，佢只係一個走頭冇路既廢柴。
我冇留遺書，我既故事、市民對我既睇法，由得啲報紙佬點寫。
我唔想理。
我畏高，如果望左落去，我一定淆底唔敢跳出去，所以視線冇向下移過半秒。
不過我知道下面街，就係之前我救女神既地方。我特登揀呢道跳，就係希望我既死能夠更轟動，比人留意到。
我吐一口氣，唔諗咁多，要死就渣渣淋啦！
我用力一跳，好快就向下急墮。
我享受夜風撲面既快感，心靈頓時向天空解放。
不過只係維持一剎那。
「仆街！點會有棵樹！」
我見到我自己跌緊落一棵大榕樹度。
我句野都未講完，已經撞左落去。身體係樹枝間穿插碰上，整斷左唔少樹枝，卸左我唔少力。
最後先跌落地。
「哎呀！」
唔知邊度傳黎一聲唔係我發出既慘叫。我唔得閒理，我個頭好暈。
屌，點解唔比我死！係咪真係要咁玩我？
本來想發多陣勞蘇，不過好快我又比另一件事令我分心。
我面前企左一個女仔，好愕然咁望住我。
呢個時候，我先發現自己坐住左一個男人。
佢睇黎好辛苦，應該係比我跌落黎個陣擲中左，起碼有幾條骨比我擲斷。頭先個下慘叫，應該係佢嗌架喇。
唔撚係嘛……
「你……你係騎士？」女仔又驚又喜咁問‧
我一如以往。
走！
第二朝，我落去報攤，睇到頭條個刻，我差啲暈低。
「騎士第三度現身 飛身撲救被搶Iphone少女」
沒有留言:
發佈留言